On dì che ndavo de ramengo pai Monti, me so fermà a vardare on sasso, par tera sul sentiero, dove che de sassi ghe ne jera on mucio. Sto sasseto però, a difarensa de chealtri me xe saltà a l'ocio par la forma: el jera fato a core, de color maron, on poco ruvido e consumà. Lo tiro su, lo vardo ben, lo sneto on poco col corteìn, lo rivardo, me meto i ociai e, el sasso me ga parso subito curioso, tanto curioso che, vardandolo, me lo so ramenà in man fin a la machina, ficandolo dopo drento al portaciche.
La domenega drio, de novo de sbrinsolòn pae tere gobe, vissin a Monte Rico. Passando par la cava granda, go catà dei tosi che frantumava sassi: chi col martelo, chi col marteleto, e chi col picòn, e visto ch’el laòro me parèa on poco da stupidoti – cavare sassi par romparli e po butarli via - ghe so ndà vissìn, par domandarghe cossa che i fasèsse:
"Eh, bondì tosi!" li vardo, - face da inseminii - "Ma disìme, cossa sio drio fare de beo?"
"Serchemo fossili", me risponde uno, co fare on poco da bauco, "…Serca-serca, calcossa se cata."
Ghe fasso mi: "Che tipo de fossili?"
“Rispolie” me risponde nantro, "i xe fossili de rici de mare, de 60 milioni de ani, i ga la forma a core." - To, el bauco xe on siensiato -
"…Xe roba rara, che se cata qua, in meso ae lastre de calcare" continua staltro,
"Ansi, se poe catàre anche altre robe, come denti de squai o, i stenonaster". Co sta ultima paroea, el bauco-siensiato me ga copà; so restà incocaìo.
Me so ramenà on fià par i me pensieri e me so dito, (a vose bassa però)
"Ma quanto gnorrante soi?" …Subito, me ga ciapà na smania de conossare ca no ve digo. Bisognava ca impenìsse subito el vodo de saère che me catàvo dosso, …gnanca par colpa mia.
Ma no se pol miga aver studià tuto a sto mondo!
Beh, me so messo a vardare a sercare a roversare sassi anca mi: ogni piera me parèa quea giusta e, tra de mi, dixevo:
"Staolta eo cato, …sento ch’el xe qua drento", e zo pache, e zo a far s-cense par edare se saltava fora el core-fossile, ma gnente. …E serca-serca, e ore passa. Riva e diese, sento sonar le undese e gnente. Masegne, sassi e basta! Quanti ghe n’ò ramenà! …Intanto, i sona anca mesodì. …E mi, gnente! Anca i ruma-sassi jera andai via.
Ne la cava jero restà mi solo, in meso a on mare de masègne, folgorà, ansi no, fossilisà. Co me sfregolavo i oci me parèa de tirare via lastre de calcare. Cussì, vardando come on imbriago, go fissà na gobeta su na piera, la vardo mejo, me meto i ociai, la tegno fissà coi oci, staolta no eà me scampa, la ciapo in man e, …non m’incorso miga che la gobeta ga do strissi? Oto èdare po! …I jera strissi fati ben, naturai. Ma sicuro, on fossile! Na, naaa … Alora, ciapo nantro sasso e scomissio a bàtare intorno a la gobeta, …a poco a poco me salta fora na, naaa, …cossa galo dito là, el siensiato baucoto? …Na ri, ri, sì eco, na …rispoglia porca miseria! Gavevo trovà na rarità de 60, digo 60 milioni de ani. …No so se me capì, ma 60 milioni de ani fa, ch’el toco de sasso noava in tel mare!
Fora de mi, contento e ingalossà, go continuà a fissare le piere, vedevo rispolie dapartuto, anca i me oci i gavea ciapà la forma del fossileto. Vedevo sassi a forma de core anca dove ghe jera de le lastre da meso metro quadrato. …Cossa? …On pesse? …On pesse che noàva so on mare de sassi, …na piera pi grossa parèa on pessecan. …Scorlandome ea testa e sfregolandome i oci, vardo l’orolojo: jera passà on boto. Par fortuna, me decido de 'vere anca fame e de tornare a la machina pa ndare casa, …che eà Teresa non la stasse in pensiero, orpo! Senò a la sera me saria catà in te "chi-l'ha-isto". …Fin che caminavo, contento e fora de mi, vardavo el fossileto e, par ‘vere on’idea del tempo, sercavo de mètare in fia tuti i 60 milioni de ani, …ses-san-ta-mi-li-o-ni… - ma, i xe on mucio cribio! Anca massa -.
In machina che jero, subito me vien da confrontare el fossile pena catà co staltro sasso, che gavevo messo nel portaciche la domenega vanti e, to! …Varda che roba! I do sassi i par zemei, uguai, identici, …on fià pi scuro uno, on fiatin pi fruà, ma no ghe jera dubi, stesso pare e stessa mare. …Pitosto, te vegneva da pensare che invesse de 60 milioni de ani, staltro pi fruadeo e scureto, el ne gavesse 65 milioni. …Difarensa da poco!
Ma varda ti! Do rispolie nel giro de na setimana! Pensare che staltri paleontologi, siensiati-baucoti e ruma-sassi, i me gavèa dito che le jera na rarità. In te ch’el momento go capìo che mi jero fato par la natura e la natura jera roba giusta par mi!
….Spetè on momento. … Cossa xea sta roba, ..qua de fianco?

…MA-MADE CHI-CHINA, MADE CHINA!?!?
Cinesi del casso, anca qua? …Ma ndè in malorsega!


Mario Berto